ভাৰতবৰ্ষৰ প্ৰখ্যাত আয়ুৰ্বেদাৰ্য্যসকলে কোমোৰাৰ প্ৰয়োগৰ বিষয়ে একমুখে কি পৰামৰ্শ আগবঢ়াইছে জানি‌ লওক : Assamese Health Tips

অসমীয়া গৃহিনীসকলৰ সুস্বাদু ব্যঞ্জনৰ তালিকাত জালি কোমোৰাই অতীতৰ পৰাই এক মহত্বপূৰ্ণস্থান দখল কৰি আহিছে৷  ( Assamese Health Tips )

কোমোৰাৰে বনোৱা ঘাইকৈ উত্তৰ ভাৰতৰ আগ্ৰা চহৰত উপলব্ধ 'পেথা' নামৰ মিঠাইৰ স্বাদ হয়তো আপোনালোকৰ বহুতে লৈছে৷ আপোনালোকে হয়তো নাজানে পাকিস্তান দেশতো পেথা হ'ল এক সম্ভ্ৰান্ত মিঠাই৷ আকৌ শকত থুলন্তৰ মানুহৰ দেহাটোক কোমোৰাৰ সৈতে ৰিজনি নিদিয়ে জানো ? পিছে এই কোমোৰাৰ গুণাৱলী আপোনালোকৰ কিমানে জানে ? সেই কোমোৰাৰ বিষয়ে কিছু অজানা কথা মই আজি আপোনালোকক অৱগত কৰিব ওলাইছোঁ৷

কোমোৰাৰ প্ৰাথমিক উৎপত্তিস্থল হ'ল চীন,জাপান,মালেয়চিয়া আৰু ইণ্ডোনেচিয়া ৷ কালক্ৰমত কোমোৰাৰ সঁচ ভাৰত,পাকিস্তান,বাংলাদেশ আৰু দক্ষিণ পূৱ এচিয়াৰ আন দেশলৈকো বিয়পি পৰে৷ ৫ম আৰু ৬ষ্ঠ শতিকাৰ চীনা গ্ৰন্থাৱলীত কোমোৰাৰ বৰ্ণনা পোৱা যায়৷

কোমোৰাৰ বৈজ্ঞানিক নাম হ'ল Benincasa hispida ৷ ই তিঁয়হৰ সৈতে একে বংশৰ (Cucurbitaceae family) ৷ ইংৰাজী নাম কেইবাটাও যেনে- Ash gourd, White gourd , Winter Melon,Wax gourd, Green Pumkin, Tallow gourd, Chinese watermelon ৷ অসমীয়াত কোমোৰা, চাল কোমোৰা,কুষ্মাণ্ড বুলে৷ বাংলাত জনা যায় কুষ্মাণ্ড, কুমোড়, চাল কুমড়া নামেৰে৷ হিন্দীত পেথা আৰু পেথাকড্ডু বুলে৷ সংস্কৃতত বুলে বৃহৎফলা, গ্ৰাম্যকৰ্কটি, কুষ্মাণ্ড৷ আন ভাষাত পৰিচয় হ'ল এইদৰে- মণিপুৰি (টৰোবট),মাৰাঠী (কোহলা),তামিল (নীৰ পোচানিকাই),মলয়ালম (কুম্বলংগা),মিচিং (পাৰো টাপা), কানাড়া (বুদেকুম্বালাকায়ী), ডিমাচা (খাউখ্লু ),টাই (ফাক্ পাক)৷

কোমোৰা হ'ল বৰ্ষজীৱী লতা৷ ইয়াত প্ৰায় ৩ইঞ্চি বহল হালধীয়া ফুল ফুলে৷ শুং থকা পাতৰ আকৃতি কলিজাৰ দৰে৷ ফল পোনতে সেউজীয়া মিহি নোমযুক্ত হয়৷ কিন্তু পূৰঠ হ'লে হয় মিহি, বগা ছাই বৰণৰ যেন তাত মমৰ প্ৰলেপ সনা হৈছে৷ কোমোৰাৰ আকৃতি দীঘলীয়া বা ঘূৰণীয়া হব পাৰে৷ একোটা দীঘল কোমোৰা ১৬ইঞ্চিলৈকে দীঘল হব পাৰে৷ কোমোৰাৰ গুটিৰ আকৃতি দীঘল ১চেন্টিমিটাৰ মানৰ৷ কোমোৰা হ'ল এবিধ শীতল ফল,য'ত ৯৬শতাংশ পানী থাকে৷ ইয়াৰ স্বাদ প্ৰায় তিঁয়হৰ দৰেই৷ পূৰঠ কোমোৰা ৩৷৪মাহলৈ বেয়া নোহোৱাকৈ সংৰক্ষণ কৰি থব পাৰি৷

বিশ্বৰ বিভিন্ন দেশত কোমোৰাৰ গুণাৱলীৰ ওপৰত বৈজ্ঞানিক বিশ্লেষণ আৰু প্ৰয়োগ কৰি অহা হৈছে৷ তাৰে কেইটামান পাঠকৰ আগত ডাঙি ধৰিলোঁ :

• ১৯৯৫চনত চলোৱা অধ্যয়নৰ মতে কোমোৰাৰ দ্বাৰা কিডনি বিকল হোৱা (CKD) বিলাতি এন্দুৰৰ কিডনিৰ উন্নতি ঘটোৱা পৰিলক্ষিত হয়৷ ( Jiangsu Journal of Agricultural Sciences)

• ২০০০চনত কৰা পৰীক্ষাৰ মতে মৰফিনৰ নিচাসক্তিৰ চিকিৎসাত কোমোৰা ফলপ্ৰসু ৷ (Fitoterapiaত প্ৰকাশিত)৷ 

• বিলাতী এন্দুৰৰ পাকস্থলীৰ ঘাঁ শুকোৱা গুণ কোমোৰাত দেখা গ'ল ২০০১চনত (Journal of Ethnopharmacologyত প্ৰকাশিত তথ্য)

• ডায়েবেটিজৰ চিকিৎসাৰ বাবে কোমোৰা উপকাৰী ৷ কিয়নো বিলাতী এন্দুৰৰ তেজৰ গ্ল'কজৰ পৰিমান কমায়,ইনচুলিনৰ সক্ৰিয়তা বৃদ্ধি কৰে আৰু অপকাৰী ক'লষ্টেৰলৰ পৰিমান হ্ৰাস কৰে৷ ( ২০০৩চনৰ Korean Journal of Nutritionত প্ৰকাশিত তথ্য) 

• ২০০৩চনত প্ৰকাশিত তথ্য মতে বিলাতী এন্দুৰৰ মানসিক উদাসীনতা (Depression) কোমোৰাৰ ভক্ষনে আতৰ কৰে৷ (Indian Journal of Pharmacologyত প্ৰকাশিত তথ্য)

• ২০০৫চনত প্ৰকাশ হোৱা তথ্যমতে কোমোৰাৰ এন্টিডায়ৰিয়েল গুণ প্ৰমাণিত হৈছে ৷ (Indian Journal of Pharmacologyত প্ৰকাশিত)

• বিলাতী এন্দুৰত পৰীক্ষা কৰি দেখা গ'ল কোমোৰাৰ প্ৰয়োগে টিউমাৰৰ তেজৰ প্ৰবাহত বাধা দিয়ে যাৰ ফলত কৰ্কট ৰোগৰ বৃদ্ধি বাধা প্ৰাপ্ত হয়৷ ( ২০০৫চনত Journal of Ethnopharmacologyত প্ৰকাশ কৰা মতে )

• কোমোৰাত এন্টি-ইনফ্লেমেটৰি আৰু বিষনাশক গুণ দেখা গৈছে ৷ (International Journal of Pharmacologyৰ ২০১০চনত প্ৰকাশিত তথ্য)

* এতিয়া ভাৰতবৰ্ষৰ প্ৰখাত আয়ুৰ্বেদাৰ্য্যসকলে কোমোৰাৰ প্ৰয়োগৰ বিষয়ে একমুখে কি পৰামৰ্শ আগবঢ়াইছে সেয়া চাওক :

১- নানাবিধ পাক প্ৰণালীৰ বিকাৰ,শৰীৰৰ কিডনি,লিভাৰ,হৃদযন্ত্ৰ আদি ভালে ৰাখিবলৈ নিয়মীয়াকৈ কোমোৰাৰ ৰস পান কৰা উচিত৷

২-ডায়েবেটিজ নিয়ন্ত্ৰণৰ বাবে কোমোৰাৰ ৰসৰ সৈতে বেলপাতৰ ৰস মিহলাই খালে উপকৃত হব৷

৩- ৰক্তহীনতা আতৰোৱাত কোমোৰাৰ ৰসৰ সৈতে নৰসিংহ পাতৰ ৰস মিহলাই খালে সেই মিশ্ৰণে হাৰ্বেল টনিকৰ দৰে ক্ৰিয়া কৰে৷ ( Assamese Health Tips )

৪- থাইৰয়েডৰ বিকাৰ আতৰ কৰিবলৈকোমোৰাৰ ৰসৰ সৈতে ধনীয়া পাতৰ ৰস মিহলাই খাব লাগে৷

৫-পচলাৰ ৰস আৰুকোমোৰাৰ ৰসৰ মিশ্ৰণ বসন্ত ৰোগীৰ বাবে সহায়কাৰী৷

কোমোৰাৰ ৰস কেনেকৈ ওলিয়াব আৰু কেনেকৈ খাব?

কোমোৰাৰ বাকলি আৰু গুটি অংশ কাটি আতৰাই লব৷ কোমোৰা যিমানে বেচি পূৰঠ হয় ৰস সিমানে বেচি স্বাদিষ্ট হয়৷ প্ৰায় দেড়শ গ্ৰাম কোমোৰাৰ পৰা এগিলাচ ৰস ওলায়৷ সৰু সৰুকৈ কূটা কোমোৰাৰ টুকোৰা মিক্সাৰ বা জুচাৰৰ সহায়ত ৰস ওলিয়াবলৈ ব্যৱহাৰ কৰক৷ মিক্সাৰৰ পিচাখিনি পাতল কপাহী কাপোৰৰে চেকি লব৷ সেই সিঠাখিনি পেলাই নিদি মূৰৰ চুলি বা ছালত ঘঁহিব পাৰিব৷ উফি,খহু, ব্ৰণ আদি আতৰ কৰাত সহায়ক হব৷ কোমোৰাৰ ৰসত নিমখ, মছলা,নেমু আদি নিমিহলাব৷ ফ্ৰিজত ভৰাই নথৈ সতেজ বা ফ্ৰেচ অৱস্থাতেই ঘটঘটকৈ পি নাখাই এঘুট এঘুটকৈ লাহে ধীৰে খাব৷ পুৱা খালি পেটত নিতৌ এগিলাচ ৰসৰ সেৱন এনেদৰে কৰক৷ এক দেড় ঘন্টালৈ আন গোটা খাদ্য গ্ৰহণ নকৰিব৷ সজীৱতা উপলব্ধি কৰাৰ ওপৰিও কোমোৰাৰ আন আন গুণৰ দ্বাৰা আপুনি উপকৃত হব ৷ কোমোৰাৰ ৰসক সকলো ৰসৰ ভিতৰত সৰ্বোত্তম (King of all juices) বুলি গণ্য কৰা হয়৷

কোমোৰা কেনেদৰে ব্যৱহৃত হয়?

সুস্বাস্থ্যৰ বাবে ৰস ওলিয়াই খোৱাৰ ওপৰিও কোমোৰা ভাজি-তৰকাৰী বা আঞ্জাত দি ৰান্ধি নাইবা কেঁচাই চালাড,ৰায়তা আদি বনাই খাব পাৰি৷ দক্ষিণ ভাৰতৰ লোক সকলে নৰসিংহ,নাৰিকল আৰু পিঠা গুড়িৰ সৈতে পিঁয়াজ-নহৰু আদি দি জুতি লগাই ৰান্ধি খায়৷ অসমীয়া ৰন্ধনশালৰ কথা মই নকলেও আপোনালোকে জানেই৷

কোমোৰাত কি কি লাগতিয়াল তত্ব থাকে?

কোমোৰা হ'ল প্ৰটিন,কাৰ্বোহাইড্ৰেট,ডায়েটেৰী ফাইবাৰ, এন্টিঅক্সিডেন্ট, ভিটামিন আৰু লাগতিয়াল খনিজ তত্বৰ সমাহাৰ৷ ভিটামিন কেইবিধ হ'ল ভিটামিন-চি, নিয়াচিন,ৰাইব'ফ্লেবিন,থায়ামিন৷ খনিজ কেইবিধ হ'ল মেগনেচিয়াম, মেংগানিজ,আইৰন,জিংক আৰু ফচফ'ৰাচ৷ ইয়াত থকা পানীৰ পৰিমাণ হ'ল ৯৬শতাংশ৷ কোমোৰাৰ ৰস হ'ল এলকেলাইন (পিএইচ ৭.২) অৰ্থাৎ খাৰুৱা স্বাদৰ৷

কোমোৰাৰ বহুমুখী উপকাৰিতাৰ তালিকা:

• পাক প্ৰণালীৰ অনেক উপকাৰ কৰে৷ সেইবিলাক হ'ল এচিডিটি কমোৱা,অজীৰ্ণ-বদহজমি আতৰ কৰা, হাগনি আৰু শৌচ-কচা আতৰ কৰা, পাকস্থলীৰ ঘাঁ শুকোৱাত সহায়ক হোৱা আদি৷

• ৰক্তক্ষৰণ ৰোধ কৰা- নাকৰ আৰু দাঁতৰ আলুৰ তেজ ওলোৱা বন্ধ কৰে৷

• ডায়েবেটিজৰ নিয়ন্ত্ৰণত ফলপ্ৰসু৷ 

• শ্বাসপ্ৰণালীৰ ৰোগ যেনে হাঁপানি,চৰ্দি, নিউমোনিয়া আদিৰ চিকিৎসাত উপযোগী৷ 

• হৃদৰোগীৰ বাবে লাভজনক খাদ্য- ৰক্তচাপ নিয়ন্ত্ৰণ, তেজৰ অপকাৰী ক'লেষ্টৰল হ্ৰাস কৰা আদি গুণসমৃদ্ধ৷

• মেদবহুলতা কমোৱা আৰু শকত লোকৰ ওজন হ্ৰাস কৰাত সহায়ক৷

• চুলিৰ শ্ৰীবৃদ্ধি কৰা উফি আতৰ কৰাত সহায়ক৷ 

• ছালৰ কমনীয়তা আৰু উজ্বলতা বঢ়ায়৷ ব্ৰণ,খহু আদি ভাল কৰে৷ ছালৰ দাগ আতৰ কৰে৷ 

• জুইয়ে পোৰাৰ চিকিৎসাত কোমোৰা পিচি প্ৰলেপ দিব লাগে৷

• নানাবিধ মানসিক ৰোগ যেনে মৃগী,ডিপ্ৰেচন, স্মৃতিলোপ পোৱা আদিৰ ক্ষেত্ৰত কোমোৰা উপযোগী৷ কোমোৰাই মগজুৰ ভবা-চিন্তাৰ মেধা শক্তি বঢ়ায়৷ অপ্ৰিয় হলেও শুনা কথা আমাৰ দেশতেই কোনো কোনো ঠাইত তথাকথিত উচ্চবৰ্ণৰ লোকে নিম্নবৰ্গৰ লোকক কোমোৰা খোৱা বাৰন কৰিছিল৷

• টেনচন,ষ্ট্ৰেচ আদিৰ ফলত হোৱা নিদ্ৰাহীনতা কোমোৰাই আতৰ কৰে৷

• ডায়েবেটিজ ৰোগীৰ বাবে উপযোগী খাদ্য৷

• তেজ পৰিশোধন কৰে৷

• প্ৰসাবৰ সংক্ৰমণ আতৰ কৰে৷ মূত্ৰ প্ৰণালীৰ পাথৰ নিষ্কাশনত সহায়ক৷

• আয়ুৰ্বেদিক চিকিৎসকৰ মতে সকলো ধৰণৰ পেলু,ঘাইকৈ ফিটা পেলু নিৰ্মূল কৰাৰ দাবী ৷

• শৰীৰৰ ইমিউনিটি বঢ়ায়৷

• কৰ্কট ৰোগৰ নিয়ন্ত্ৰণত ভূমিকা আগবঢ়োৱাৰ প্ৰচুৰ সম্ভাৱনা দেখা গৈছে৷

সতৰ্কতা –

-গৰ্ভৱতী মহিলাই গৰ্ভাৱস্থাৰ প্ৰথম ৩মাহত কোমোৰা নোখোৱাটো বাঞ্চনীয়৷

-কাচিৎ কোনো লোকৰ কোমোৰা খাই কিবা পাৰ্শ্বক্ৰিয়া দেখা দিলে তাৰ প্ৰতিকাৰ কৰিবলৈ পদিনা পাত,লং,জিৰা নহলে শুকান আদা ব্যৱহাৰ কৰিব লাগে৷

ডা০ ভূপেন শইকীয়া

উৎস : ফেচবুক 

বি:দ্ৰ: আপোনালোকেও যদি কোনো লেখা বা গল্প কবিতা বা বাতৰি  ইত্যাদি  আমাৰ ৱেবচাইটত প্ৰকাশ কৰিব বিচাৰে তেন্তে আপোনালোকৰ লেখাসমূহ আমাৰ ফেচবুক পেজ/ SMJ24 ৰ  মুখ্য পৰিচালনা সঞ্চালক দিব্য জ্যোতি দত্তৰ ফেচবুক পেজৰ ইনবক্স প্রেৰণ কৰিবলৈ আহ্বান জনালো নিবাৰ্চিত লেখাসমূহ লেখকৰ নাম আৰু ছবিসহ আমাৰ ৱেবচাইটত প্ৰকাশ কৰা হব ।

 ( Assamese Health Tips )

আমাৰ ফেচবুক গ্ৰুপৰ লিংক - SMJ24.facbookgroup

আমাৰ ফেচবুক পেজৰ লিংক - www.SMJ24.facebook page