এটি সাত বছৰীয়া কণমানিয়ে পিতৃ-মাতৃক দিলে পাপ-পূন্যৰ জ্ঞান : Storyboard

   বজাৰৰ পৰা আহি পাচলিৰ মোনাটো ভবেনে দীপালীৰ হাতত দি ক'লে--( Storyboard )

  "জোনৰ কাৰণে পাৰৰ মাংস অলপ আনিছোঁ । জালুক অকণমান দি ভালকৈ  ৰান্ধিবাচোন । কালিৰ পৰা সি একোৱে খাবলৈ মন নকৰা হৈছে । কিজানিবা ভাতকেইটা আজি খায়েই !"

        

        দীপালীয়ে মোনাটোৰ পৰা পাচলিখিনি উলিয়াই ,মাংসখিনি ধুবলৈ যো-জা কৰিলে । 

   " মই গাটো তিয়াই লওঁগৈ । অলপ ৰমেনহঁতৰ ঘৰৰ পৰা আহোঁগৈ । সকামৰ কি ক'ত কৰিছে ,খবৰ এটা লৈ আহোঁগৈ । আহি ভাত খাম । তোমাৰ ৰান্ধি- মেলি হয় মানে আহিয়েই পাম "

   " হ'ব দিয়ক । মই জোনক গাটো অলপ ধুৱাই দিওঁগৈ । আপুনি আহকগৈ । "

         দুপৰীয়া জোনক গা ধুৱাই -মেলি দি দীপালী পাকঘৰৰ ৰন্ধা-বঢ়া কামত লাগিল । দুবাৰমান জোনক মাত দি দীপালীয়ে ল'ৰাটো বাৰীত  থকাৰ উমান ল'লে । 

     

      ভবেন ডেৰ ঘণ্টামানৰ পিছত ঘৰ পালেহি । 

চোতালৰ পৰাই  দিপালীয়ে ৰন্ধা মাংসৰ আঞ্জাৰ গোন্ধটো ভবেনৰ নাকত লাগিল । ধুনীয়া গোন্ধাইছে ! ল'ৰাটোৱে ভাতকেইটা খালেই হয় আৰু ! --ভবেনে ভাবিলে । 

    "আপুনি আহিল নেকি?"--গিৰিয়েক অহা গম পাই দীপালীয়ে মাত লগালে  । ( Storyboard )

  "অঁ । ভাত হ'লনে?"

  " হৈছে ,দিওঁ আৰু । "

  " অঁ, দিয়া দিয়া । জোন ক'ত হে ? দেখা নাইচোন !"

 "আছে ক'ৰবাত ওচৰতে । বাৰীৰ পিনে গৈছে 

চাগৈ । এইমাত্ৰ মাত দিছিল মোক । "

   "অঁ হ'ব দিয়া । তুমি ভাত বাঢ়া । "

 

      দীপালীয়ে ভাত -পানী বাঢ়ি খোৱা টেবুলত থ'লেহি । 

 সাত বছৰীয়া জোনে চোতালৰ পৰা চিঞৰি মাত লগালে --"মা, দেউতা,  চোৱাহিচোন !"

  "কি হ'ল জোন?"--ভবেন ভিতৰৰ পৰা চোতাললৈ ওলাই আহিল । দীপালীও চোতাল পালেহি । 

 "কোনে মাৰিলে এই পাৰটো চোৱাচোন ! বাৰীত পৰি আছিল ।  পাপ লাগিব তাৰ !"--কন্দনামুৱা হৈ  সি দেউতাক আৰু মাকৰ মুখলৈ চালে । 

  জোনৰ হাতত পাৰটোৰ গাৰ পৰা ওলোৱা 

তেজ । ভবেন মৌন হৈ ৰ'ল । সি দীপালীলৈ

চালে--

  "আঞ্জাখিনি থৈ দিয়াগৈ যোৱা । দিব নালাগে জোনক । মই ফাৰ্মাচীৰ পৰা দৰব দুটামান আনোঁগৈ তালৈ । আহি ভাত খাম ... । " 

  দীপালী ভিতৰলৈ সোমাই আহিল... । 

এনেধৰনৰ আৰু গল্প/উপন্যাস পঢ়ক এই লিংকত - www.গল্প/উপন্যাস.com

বিঃদ্ৰঃ Social Media Journalism ফেচবুক গ্ৰুপৰ এগৰাকী সন্মানীয় অঞ্জনা দত্তৰ দ্বাৰা গ্ৰুপত প্ৰকাশিত ( ( Storyboard ) )।আপোনালোকেও যদি কোনো লেখা বা গল্প কবিতা,বা-বাতৰি ইত্যাদি আমাৰ ৱেবছাইটত প্ৰকাশ কৰিব বিছাৰে তেন্তে আপোনালোকৰ লেখা সমূহ আমাৰ ফেচবুক গ্ৰুপত প্ৰকাশ কৰিবলৈ নতুবা আমাৰ ফেচবুক পেজ/ SMJ24 ৰ মুখ্য পৰিচালন সঞ্চালক দিব্য জ্যোতি দত্তৰ ফেচবুক পেজৰ ইনবক্সত প্ৰেৰণ কৰিবলৈ আহ্বান জনালো।নিৰ্বাচিত লেখা সমূহ লেখকৰ নাম আৰু ছবি সহ আমাৰ ৱেবছাইটত প্ৰকাশ কৰা হব,ধন্যবাদ।

আমাৰ ফেচবুক গ্ৰুপৰ লিংক - SMJ24.facbookgroup

আমাৰ ফেচবুক পেজৰ লিংক - www.SMJ24.facebook page

দিব্য জ্যোতি দত্তৰ ফেচবুক পেজৰ লিংক - Dibya Jyoti Dutta/Fb page