উৰ্মি আৰু অনিমেষ পদূলিত ঠিয় হোৱাৰ লগে লগেই দীপু দৌৰি আহিল...., বা , ভিনদেউ পালেহি...., আহক আমাৰ ঘৰলৈকে ।Assamese story
: পালোঁহি দীপু..., উৰ্মিহঁত খুড়াকৰ ঘৰলৈ সোমাই গ'ল । ড্ৰয়িং ৰূমতে বহিবলৈ দি সাউৎকৰি ভিতৰলৈ সোমাই গৈ পানী দুগিলাচ আনি ভিনীয়েকহঁতলৈ আগবঢ়াই দিলে । ......ভিনদেউ পানী লওঁক.....
: দীপু , বহচোন...! খুড়া খুড়ী নাই নেকি...! উৰ্মিয়ে প্ৰশ্ন কৰিলে । দীপু উৰ্মিৰ কাষতে বহিলে ।
: মা আইসবাহ এভাগ ভাঙিবলৈ গৈছে , দেউতা বাৰীতে আছে...
: মাহঁত যাওঁতে তোক কিবা কৈছিল নেকি...?
: নাই কোৱা বা, মাত্ৰ চাবিপাত দি থৈ গৈছে ।
: শুন...! মই কথা এটা ভাবিছোঁ...! দেউতা যদি সোনকালে ঘূৰি নাহে আৰু দেউতাক যদি চেন্নাই লৈ নিয়াটো হয়.. তেতিয়া তয়ো লগত যাব লাগিব ।
: কিন্তু বা....?
: তই চিন্তা কৰিব নালাগে...! সকলো খৰচ মই বহন কৰিম । তই মাত্ৰ মা দেউতাক সহায় কৰিলেই হ'ল ...! মাহঁত গুৱাহাটী পাই লওঁক গৈ । ডাক্তৰে কি কয় সকলো মাৰ পৰা জানি ল'ব লাগিব । যদি গুৱাহাটীতে ভাল হয় তই নগ'লেও হ'ব ।
: নহয় উৰ্মি , দীপু গুৱাহাটীলৈকে যাওঁক , দেউতাক ক'ত এডমিট কৰে মাক সুধি দীপুক জনাই দিলেই হ'ব , দীপু থাকিলে অন্ততঃ মাৰ সুবিধা হ'ব । অনিমেষে লাহেকৈ ক'লে ।
: কথাটো বৰ ভাল ন'হব নেকি ভিনদেউ...!
: কিয় দীপু..?
: মানে ভিনদেউ... বৰমায়ে মোক লগত নিবলৈ বিচৰা নাই । ৰাতিপুৱা মই বৰমাক লগত যাম বুলি কৈছিলোঁ । কিন্তু বৰমায়ে মোৰ কথাত গুৰুত্বই নিদিলে.....।
: আচলতে কি জানা অনি...! মায়ে কাৰোবাৰ পৰা সহায় ললে আত্মসন্মান হানি হ'ব বুলি ভাবে । এইটো মাৰ বৰ বেয়া স্বভাৱ । শুনিবলৈ বেয়া যদিও এটা কথা ক'বই লাগিব , মায়ে দীপুহঁতক নিজৰ বুলি ভাবিবই নোৱাৰে..... । বৰ দুখেৰে উৰ্মিয়ে কলে...,
: বা , সেইবোৰ কথা বাদ দেচোন....! ময়টো বৰমা বর্তাক পৰ বুলি নাভাবোঁ । কিবা এটা বিপদ হলে মই জানো ভিতৰত সোমাই থাকিব পাৰিম ।
: তোৰ কথা মই বুজি পাওঁ দীপু...! তই কেতিয়াও আমাক পৰ বুলি নাভাব......, কিন্তু মাৰ মনটো তোৰ মোৰ দৰে নহয় । চাবিপাত দে ...! আমি যাওঁ ।
: অকণমান বহ...! মই চাহ কৰোগৈ...
: তই নালাগে দীপু , ময়ে চাহ কৰোগৈ । তই ভিনিহিয়েৰৰ লগত কথা পাত...., কথাষাৰ কৈ উৰ্মি পাকঘৰলৈ সোমাই গ'ল ।
: ভিনদেউ , মাহঁতৰ ভাল নে....
: ভালেই আছে দীপু ,
: আপুনি কেইদিনমান থাকিব নহয় ভিনদেউ...?
: চাই লওচোন পৰিস্থিতি কি হয় ..., দেউতা ঘূৰি নহালৈকে থাকিবই লাগিব । দীপু ... তোমাক যদি উৰ্মিয়ে বাগানৰ কামবোৰ বুজাই দিয়ে তুমি কামবোৰ কৰিব পাৰিবা নহয়....!
: পাৰিম ভিনদেউ ,
: মই এই বিষয়ে উৰ্মিৰ লগত কথা পাতি তোমাক জনাম । জানাই নহয় , প্ৰাইভেট চাকৰি বেছিকৈ চুটি নাপাওঁ । সেয়ে চিন্তা হৈছে ।
....... অ'....সেউতি..! চাহ একাপ দে চোন..., ডিঙিটো একেবাৰে শুকাই গৈছে । গামোচাখনেৰে মুখখন মোহাৰি খুড়াক ভিতৰলৈ সোমাই আহিল ।
: দেউতা , মা নাই ঘৰত । উৰ্মি বা আহিছে ।
উৰ্মি অহাৰ খবৰ পাই খৰখেদাকৈ খুড়াক ড্ৰয়িং ৰূমলৈ সোমাই আহিল । .....অনি বোপা ...! ভালে আছা নে....? হাতৰ গামোচাখন কান্ধত থৈ মজিয়াতে বহিল খুড়াক ।
: আপোনালোকৰ আৰ্শীবাদত ভালেই আছোঁ খুড়া । আপোনাৰ ভাল...
: কিনো ভাল বুলি কম...! ককাইদেউ বোলে গাটো বেয়া , ৰাতি উৰ্মিয়ে ফোন কৰিলতহে গম পাইছোঁ । ভায়েটোক বাৰু কথাটো কব পাৰে নে নাই সি...? ৰাতিপুৱাই গুৱাহাটীলৈ গৈছে । বুজিছা বোপাই , আমাক খবৰ দি কি লাভ । টকা পইচা নাই যে মাতষাৰৰ বাহিৰে আমিনো কি দি সহায় কৰিম । কথাবোৰ ভাবিলে কেতিয়াবা বৰ দুখ লাগে ....... বৰ দুখেৰে কথা কেইটা ক'লে খুড়াকে ।
: দুখ নকৰিব খুড়া , পাঁচটা আঙুলি কেতিয়াও সমান নহয়....। আপুনি চিন্তা কৰিব বুলি ভাবিয়ে হয়টো দেউতাই আপোনাক গা বেয়া হোৱা কথাটো নজনালে ।
: খুড়া... ভালনে ...? মাতষাৰ দি হাতত চাহৰ ট্রেখন লৈ উৰ্মি ড্ৰয়িং ৰূমলৈ ওলাই আহিল ।
: ভালেই আঁচো আই , দেউতাৰ কথাকে পাতি আছোঁ...।
: উম..., চাহ লওঁক খুড়া । লৰালৰিকৈ আহিব লগা হোৱাৰ বাবে একো এটা অনাই নহ'ল ....।
: হ'ব দে আই...., তই মানুহক খুৱাই বোৱাই সন্তষ্ঠ কৰিব নোৱাৰ । মুখৰ মাতষাৰহে আচল ।
: ভিনদেউ চাহ খাওঁক , আপুনি বেয়া নাপাব । দেউতা বৰ আবেগিক । লাহেকৈ ক'লে দীপুৱে । চাহৰ কাপতটো হাতত তুলি লওঁতেই অনিমেষৰ ফোনটো বাজিল । অনিৰ্বাণে ফোন কৰিছে । চাহৰ কাপটো লাহেকৈ টেবুলত থৈ ফোনটো ৰিচিভ কৰিলে অনিমেষে .....
: হেল্ল' ...!
: তহঁত ভালে ভালে পালিগৈ নে...?
: পালোঁহি , চাহ খাবলৈ লৈছোঁ । কচোন ...!
: তহঁত ওলাই যোৱাৰ পাছতেই এইজনীয়ে মাৰ লগত কাজিয়া কৰি ককায়েকক মাতি আনিলে । মায়ে বোলে তাইক যৌতুক লৈ গালি পাৰি থাকে আৰু আমি হেনো তাইক অত্যাচাৰ কৰোঁ , মিছা বদনাম এগাল জাপি দিছে ককায়েকে..., আমাকহেনো থানালৈ নিব । এইজনীয়ে ঘৰখন খাম বুলি লাগিছে । তই আকৌ মোক জগৰীয়া কৰিবি যে , মই কাজিয়া কৰিছোঁ বুলি , সেয়ে তোক কলো...।
: ককায়েক আছে নে গ'ল ।
: গ'ল , ভনীয়েকক লগত লৈ গৈছে ।
: ঠিক আছে , মই তোক ৰাতি ফোন কৰিম । ফোনটো কাটি দিলে অনিয়ে ।
: অনি.. কোনে ফোন কৰিছিল..?
: দাদাই ফোন কৰিছিল , আমি পালোঁহি নাই খবৰ এটা ললে...
: বোপাই চাহকন খাই লোৱা... ঠাণ্ডা হ'ব ।
চাহকাপ খাই হোৱাৰ পাছতেই দীপুৱে চাবিপাত গতাই দিলে উৰ্মিক । ...... খুড়া আমি আহিছোঁ । দীপু তোৰ কিবা কাম আছে নেকি...?
: নাই বা , কিয় সুধিলি...?
: তোৰ যদি কিবা কাম আছে তই কামবোৰ কৰি আজৰি হৈ ল... আবেলিকৈ বাগানলৈ যাব লাগিব ।
: ঠিক আছে বা , তই ৰেডী হোৱাৰ আগতে মোক চিঞৰ এটা মাৰি দিবি মই বাৰীতে থাকিম ।
: হ'ব দে..., খুড়ী আহিলে এপাক যাবলৈ কবি ।
চাবিপাত হাতত লৈ খুড়াকৰ ঘৰৰ পৰা উৰ্মিহঁত ওলাই আহিল । গেটৰ তলাটো খুলি দুৱাৰখন খুলি দিলে উৰ্মিয়ে ।
: ......অনি.., তুমি ফ্ৰেচ হৈ লোৱা । মই কাপোৰযোৰ সলাই সাউৎকৰি ভাতকেইটা ৰান্ধি লওঁ ।
: উৰ্মি বৰ ডাঙৰ কথা এটা হ'ল...!
: কি হ'ল অনি...? বৌয়ে....?
: বৌয়ে আমাৰ ওপৰত বৰ ডাঙৰ অপবাদ এটা জাপি দি ককায়েক মাতি আনিলে আমাৰ ঘৰলৈ । ককায়েক বৌক ঘৰলৈ লৈ গ'ল বোলে ।
: কি...? দাদাই কি ক'লে...?
: কি ক'ব আৰু...! বৌৰ লগত দাদা জানো জিকিব পাৰিব । কি যে হৈছে ঘৰখনত .....? বৰ অশান্তি পাইছোঁ আৰু...
: সকলো ঠিক যাব অনি..., তুমি চিন্তা কৰি নাথাকিবা...। তুমি এইদৰে মন মাৰি থাকিলে মোৰ ভাল নালাগে ।
: হ'ব যোৱা । মোক কিবা এটা দিয়া মুখ হাত কেইটা ধুই লওঁ ।
বেগটো খুলি উৰ্মিয়ে কাপোৰ এযোৰ উলিয়াই দিলে অনিমেষক । .....লোৱা , ফ্ৰেচ হৈ অলপ ৰেষ্ট কৰিবা । মই পাকঘৰলৈ যাওঁ । শুনা , এতিয়া আৰু বিধ বিধ কৰি নাথাকোঁ । দাইলতে আলু দিম আৰু খাম । নে তোমাৰ কিবা আপত্তি আছে...?
: কি যে কথাবোৰ কোৱা তুমি...! কোনদিনানো মই আপত্তি কৰিছোঁ ।
: ঠিক আছে ,
ফোনটো হাতত লৈ উৰ্মি পাকঘৰলৈ সোমাই গল । খৰখেদাকৈ ভাত কেইটা ৰান্ধি উৰ্মিয়ে দীপুক এবাৰ মাত দিলে । উৰ্মিয়ে ভাতকেইটা ৰেডী কৰে মানে অনি পাকঘৰলৈ সোমাই আহি ডাইনিং টেবুলতে বহিল । ..... ভাত হ'ল যদি দিয়া । তিনটা বাজিলেই । পে'মেণ্ট কৰিব নালাগিব জানোঁ..!
: উম, হলেই ৰবা , অমলেটটো হ'লে ভাত বাঢ়িমেই ।
ভাতকেইটা খাই ড্ৰাইভাৰ ল'ৰাজনক ফোন কৰি মাতিলে উৰ্মিয়ে । সিহঁত ৰেডী হয় মানে ড্ৰাইভাৰজন আহি গাড়ীখন ৰাস্তালৈ উলিয়াই নিলে... বাইদেউ হ'ল যদি আহক ...!
: গৈছোঁ হৰিকাই...., দীপু...! অ'...দীপু , তোৰ হ'ল নে...? আমাৰ হৈ গ'ল তই ৰাস্তালৈ ওলাই আহ....
: গৈছোঁ বা..... ঘৰৰ পৰাই চিঞৰিলে দীপুৱে ।
দুৱাৰখনত তলাটো লগাই গেটখন বন্ধ কৰি গাড়ীত উঠিল উৰ্মি .... অনি , তুমি আগতে বহা । দীপু পাছলৈকে আহ ।
লাহে লাহে গাড়ীখন ধূলি উৰুৱাই আগুৱাই যাব ধৰিলে ,
ক্ৰমশঃ....
SMJ24ৰ ফেচবুক গ্ৰুপ - www.smj24.facebook.group
SMJ24ৰ ফেচবুক পেজ- www.smj24.facbook.page
SMJ24ৰ মুখ্য পৰিচামন সঞ্চালকৰ ফেচবুক পেজ - www.dibyadutta.com
No comments:
Post a Comment