ৰাতিটো কোনোৰকম পাৰ হৈ গ'ল , পানী ছটিয়াই তুলিকেইখন আগফালৰ দাৰডালতে তুলি দি তলত পৰিদিয়া খেৰবোৰ বাৰীৰ পাছফালে নি জ্বলাই দিলে উৰ্মিয়ে , পানীত জুবুৰীয়াই জুবুৰীয়াই বেদকভাৰ কেইখন টানকৈ চেপি আগফালে ৰছী এডাল টানি আঁচাৰী মেলি দিলে মৃণালিনীয়ে , গা ধোৱাৰ আগতেই ৰূমকেইটা মোহাৰি গোবৰ পানী অকণ ছটিয়াই দিলে উৰ্মিয়ে । অনিৰ্বাণে গা ধুই আহে মানে পিৰালিতে গজি থকা বনকেইডাল হাতেৰে উভালি গোবৰ মাটি অলপ লৈ মোহাৰি পেলালে উৰ্মিয়ে । মৃণালিনীয়েও নিজৰ ৰূমৰ পৰ্দা আৰু আলনাত ওলাই থকা কাপোৰবোৰ পানী ছটিয়াই ঢাপৰ জেউৰাখনতে মেলি দিলে । গোটেই কাপোৰ কানিবোৰ বাহিৰলৈ উলিয়াই দিয়া দেখি অনিমেষে মাত লগালে.... কালিলৈ টিলানি বুলি কাপোৰবোৰ আকৌ তিয়াবই লাগিব । আজি নুলিয়া হ'লেও হয় কাপোৰবোৰ ..।
: নহয় অনি..., আজি ধোৱা কাপোৰবোৰ আমি নুচুলেই হ'ল , বাটো বিয়া দিয়া ছোৱালী , বাৰ গাত চুৱা নাই নহয়... বায়ে সামৰি থব দিয়া । কালিলৈ তেতিয়া আমি ব্যৱহাৰ কৰা কাপোৰ কেইটা তিয়ালেই হ'ব ।
: ঠিক আছে তেন্তে.., চাহ অকণ খাবলৈ বৰ মন গৈছে । বায়েও গা ধোৱা নাই নহয় ।
: তৃনাকে মাতি দিয়া নহলে , গাখীৰখিনি গৰম কৰি চাহ অকণ বনাই দিয়ক ,
: ৰ'বা , তৃনাকে মাতি আনো...। অনি ওলাই গ'ল তৃনাক মাতিবলৈ । ইফালে মৃণালিনী গা ধুবলৈ সোমাল , ধুনুৱে সাৰ পাই কান্দিবলৈ ধৰিলে । বায়েকো কিবা কামত ব্যস্ত হৈ আছে । বোকা হাতখন ধুই উৰ্মিয়ে লাহেকৈ ধুনুক উঠাই আনিলে । ...... উঠিলা , অঃ.... , মোৰ গোঁসাইটো । মায়ে গা ধুইছে , নাকান্দিবা মই আঁচো নহয়..., কি হ'ল....! সৌটো চোৱা শালিকী ..., ধৰ শালিকী ..., ধৰ..., ধৰ ধৰ কৰা শুনি শালিকীটো উৰি গুচি গ'ল । ধুনুৰ কান্দোন শুনি গামোচা খনেৰে তিতা চুলিকোচা মোহাৰি খৰখেদাকৈ ওলাই আহিল মৃণালিনী.., ....ধুনু, উঠিলা । খুড়ীয়েহে লৈছে.... কিয় কান্দিছা....? ... উৰ্মি.., আমি এতিয়া ফোঁট ল'ব পাৰিম নে নাই..?
: আমাৰ তাত ঘৰৰ মূল মানুহজন ঢুকালে দহদিনলৈকে মূৰত ফণীও নলগায় ফোটো নলয়.., ইয়াত বা কি নিয়ম ...! দাদাক সোধকচোন বৌ ...
: মই নুসুধো দেই , খেচকৈ কিবা এটা কৈ দিলে বৰ লাজ পাব লাগিব....। তুমিয়ে সুধি আহাচোন..
: ৰ'ব মই সুধি আহোঁ । দাদা ক'ত আছে নো.....?
: জপনা মুখতে ৰৈ আছে , ধুনুক মোক দিয়া ।
মৃণালিনীৰ হাতত ধুনুক তুলি দি অনিৰ্বাণৰ কাষ পালেগৈ উৰ্মি.... দাদা , কি চাই আছে..? লাহেকৈ মাত লগালে উৰ্মিয়ে ।
: একো নাই , এনেয়ে ৰৈ আছোঁ ।
: দাদা , আমি ফোঁট ল'ব পাৰিম নে....!
: নিয়ম মতে নাপায় , তোমালোকে জানা...!
: আমাৰ ফালেও ঘৰৰ মূল মানুহ ঢুকালে দহ দিনলৈকে মূৰত ফণী নলগায় আৰু ফোঁট নলয় । ইয়াৰ নিয়ম নীতিবোৰ ভালকৈ নাজানো যে সেয়ে সুধিলোঁ ...! আপুনি গা ধুলে নাই দাদা ..?
: ধুলো , কাপোৰ উলিয়াই দিয়া মানুহ নাই বাবেই তিতা কাপোৰেই ৰ'দত ৰৈ আছোঁ ।
: বৌ , গা ধুই আহিল দাদা , আপোনালৈ কাপোৰ উলিয়াই দিবলৈ কওঁ.., সলাই লওঁকহি তিতা কাপোৰবোৰ....,
: গৈ আছোঁ । কাপোৰ কেইটা চকীএখনত বাহিৰলৈকে উলিয়াই দিবলৈ ক'বা ।
: ঠিক আছে দাদা , মই বৌক কওঁগৈ ।
: অ'.. বৌ..., বৌ ... দাদাৰ চুৰিয়া চেলেংখন উলিয়াই দিবচোন চোতাললৈকে । দাদা তিতা কাপোৰেই আছে ।
: উৰ্মি... শুনাচোন...! বৰ ডাঙৰ কথা হ'ল , ওলাই থকা সকলো কাপোৰ তিয়াই দিলোঁ নহয় । আলমিৰাত চুৰিয়া আছে খুলিব পাৰিম জানোঁ....!
: আলমিৰা খুলিব নালাগে বৌ , মোৰ ৰূমতে চাওঁকচোন অনিলৈ বুলি কালি তৃনাৰ হতুৱাই দুযোৰ উলিয়াই ঠোৱা আছে , তাৰ পৰাই দাদাক চুৰিয়া চেলেং এযোৰ দি দিয়ক ।
: ৰক্ষা দেই উৰ্মি...! নহলে গালি খালোঁ হেঁতেন এতিয়া ।
সুৰুঙা বুজি উৰ্মিয়ো গা ধুবলৈ সোমাল , লৰালৰিকৈ গাটো ধুই গামোচা এখনেৰে তিতা চুলিকোচা ভালকৈ বান্ধি খেৰঘৰৰ পৰা খেৰ অলপ আনি অনি আৰু অনিৰ্বাণৰ বাবে খেৰবোৰ মেলি বিচনা দুখন ঠিক কৰিলে... উৰ্মি খেৰবোৰ কিয় দিছা ...?
: নিয়ম মতে খেৰতেই শুব লাগে , কিন্তু আজিকালি নিয়মবোৰ অলপ সলনি হৈছে, সকলোৱে তুলি পাৰিয়ে লয় ।
: অঃ..., আজিলৈকে এইবোৰ কৰি পোৱাই নাই যে..., একো নাজানো সেয়ে...
: ময়ো ইমান নাজানো বৌ , দেখি দেখিহে শিকিছোঁ এইবোৰ ।
উৰ্মি..., গা ধুই আহিলা নে...! চাহ খাই লোৱাহি...., দাদা আৰু বৌক মাতি দিয়া , বাইদেউ ভিনদেউ তৃনাহঁতৰ ঘৰতে আছে । চাহ খাই আছে... , হাতত চাহৰ ম'গটো লৈ উৰ্মিক মাতষাৰ দি অনিমেষ বাৰাণ্ডালৈ সোমাই আহিল । অনিৰ্বাণক মাতষাৰ দি উৰ্মি আৰু মৃণালিনী বাৰাণ্ডালৈকে ওলাই আহি মাটিতে লেপেটা খাই বহি ললে , হাততে বাতিটো লৈ অনিৰ্বানো আহি মাটিতে বহিল । ..... অনি , চাহখিনি তুমিয়ে ভগাই দিয়া । লাহেকৈ কলে উৰ্মিয়ে ।
: ঠিক আছে দিয়া , দাদা তোৰ বাতিটো দে..., উৰ্মি মায়ে ফোন কৰিছিল নেকি...?
: নাই কৰা অনি..., ময়ো পাহৰিয়ে আছো , মাক খবৰটো দিয়া হোৱাই নাই নহয়...,
: অ' হয়নেকি...! চাহকন খাই মালৈ ফোন কৰিবা ।
: উম, টিলানীৰ বাবে ভকত নিমন্ত্ৰণ কৰিব নালাগিব জানো...!
: লাগিব , ভিনদেউ আহিলেই মই যাম বুলি ভাবি থৈছোঁ ।
চাহকন খাই অনিৰ্বাণ আৰু অনিমেষ উঠি গ'ল , উৰ্মিয়ো লাহেকৈ ভিতৰলৈ সোমাই গৈ মাকলৈ ফোন লগালে...
: হেল্ল'..., মা , কি কৰিছা ।
: কি কৰিম আৰু , ৰিপৰ্টবোৰ দেখুৱাবলৈ ডাক্তৰৰ ওচৰলৈ যাবলৈ ওলাইছোঁ । তুমি কি কৰি আছিলা ।
: চাহ খাই বহি আছিলোঁ । মা বেয়া খবৰ এটা আছে...!
: কি বেয়া খবৰ উৰ্মি...?
: মানে মা , অনিৰ মাক কালি ঢুকাল...,
: কি....? তুমি সঁচাকৈ কৈছা নে....!
: মা, কিয় মিছাকৈ কম বাৰু..., আমি আহি পোৱাৰ অলপ পাছতেই মা ঢুকাই থাকিল....
: তুমি তাৰমানে অনিৰ লগতে গ'লা...,
: অ' মা, দাদাই ফোন কৰি মাৰ গাটো বেচিকৈ বেয়া বুলি কলে । অনিয়ে মোক লগত আনিবলৈ বিচৰা নাছিল কিন্তু মইহে জোৰ কৰি গুচি আহিলোঁ মা , অনিৰ লগতে নহা হলে মই মাক নেদেখিলোঁ হেঁতেন....।
: হ'ব দে..., কি যে কপাল...,! বিপদৰ ওপৰতে বিপদ ।
: সচাঁকৈ মা , দেউতাই কি কৰি আছে...?
: হস্পিতাল যাবলৈ কাপোৰ পিন্ধি আছে..
: মা , তুমি দেউতাক কথাটো নকবা , দেউতাই গম পালে চিকিৎসা নকৰাকৈ উভতি আহিব ।
: তই সেইবোৰ চিন্তা কৰিব নালাগে , মই কিবা এটা কৰিম । হ'ব , এতিয়া ৰাখিছোঁ ।
ফোনটো টেবুলতে থৈ তুলি কেইখন ভিতৰলৈ আনি খেৰৰ ওপৰত তুলি কেইখন পাৰি বেদকভাৰ খন পাৰি দিলে । খাওঁ খাওঁ মূৰ্তি ধৰি বেলিটো উঠি মূৰৰ ওপৰ পাইছিল , লঘোণে ভোকে থকাৰ বাবে সকলোৱে গাবোৰ দুৰ্বল দুৰ্বল লাগিছিল । তুলিখন পাৰি দিয়া দেখি অনিৰ্বাণ সোমাই আহিল ঘটিটোৰ পৰা পানী এবাতি বাকী খাই তুলিখনতে অলপ দীঘল দিলে..., পদূলিতে গাড়ী এখন ৰখোৱা শুনি খিৰিকীৰে এবাৰ বাহিৰলৈ চালে উৰ্মিয়ে । গাড়ীখনৰ পৰা হাতত বেগ এটা লৈ নামি আহিল দীপু আৰু খুড়াক । বাৰাণ্ডাতে জোতাযোৰ খুলি বা... বুলি মাতষাৰ দি দীপু সোমাই আহিল ।
: আহ দীপু , খুড়া আহক , বহকচোন...।
: বা, এইটো লৈ যাচোন ...! বেগটো আগবঢ়াই দিলে উৰ্মিলৈ । দীপুহঁত সোমাই অহা দেখি শোৱাৰ পৰা উঠিল অনিৰ্বাণ...
: দাদা , এইয়া খুড়া আৰু ই মোৰ ভাইটি দীপু.. , হাঁহো নাহাহোঁকৈ হাঁহি এটা মাৰিলে অনিৰ্বাণে ।
.... দীপু , এইফালে আহচোন ...! খুড়া দাদাৰ লগত কথা পাতক , মই অনিক মাতি দিছোঁ । দীপু উৰ্মিৰ লগতে ভিতৰলৈ সোমাই গ'ল ।
: বা , মোক কিয় মাতিছিলি...?
: মই তোক সকলো দেখুৱাই দিম তই নিজে চাহ অকণ বনাই খা আৰু খুড়াকো দে....
: নালাগে বা , চাহ নাখাওঁ দে...
: আজি বায়েৰৰ ঘৰলৈ প্ৰথম আহিছ , নিজে দি হ'লেও চাহ অকণ খাই যা....,
: নবৌ নাই নেকি বা...?
: আছে , ধুনুক কিবা খুৱাইছে নেকি...! তই চকীখনতে বহ , মই বৌক মাতি দিছোঁ । ....বৌ , শুই আছে নেকি..., খুড়া আৰু ভাইটি আহিছে । বাৰাণ্ডাৰ পৰাই মাত লগালে উৰ্মিয়ে । উৰ্মিৰ মাতষাৰ শুনি ওলাই আহিল মৃণালিনী ।
: বহিছা , মই ধুনুক শোৱাই আছিলোঁ । ভাইটি ন উৰ্মিৰ...
: হয় বৌ ।
: কি নাম তোমাৰ ....?
: দীপু ,
: উৰ্মি খুড়া ক'ত....?
: খুড়া দাদাৰ ওচৰতে আছে । বৌ দীপুৰ লগত কথা পাতকচোন , মই অনিলৈ ফোন এটা কৰি খুড়া আহিছে বুলি কৈ দিওঁ ।
: ঠিক আছে যোৱা..., কি কৰি আছা তুমি..., পঢ়ি আছা নে কিবা ব্যৱসায় ...?
: এম.কম. কৰি ঘৰতে বহি আছোঁ । দেউতাৰ লগত খেতিত ব্যস্ত হৈ আছোঁ এতিয়া ।
: ভালেই কৰিছা , আজিকালি চাকৰি এটা পোৱাটো বৰ টান ।
: হয় বৌ...
: তহঁতে গা-পা ধুই আজৰি হ'লি নে....? চোতালৰ পৰাই মাতষাৰ দি অনিৰ্বাণৰ বায়েক সোমাই আহিল..., বহিছা নে...?
: হয় , বায়েকক চিনি নোপোৱাৰ বাবেই একো নুসুধিলে দীপুৱে ।
: বা , উৰ্মিৰ ভায়েক , দীপুক চিনাকি কৰাই দিলে মৃণালিনীয়ে ।
: অ'.. হয়নেকি...! কেতিয়া আহিলা ...?
: বেছি সময় হোৱা নাই...
: অকলে আহিছা নে ...! আৰু কোনোবা আহিছে ..?
: দেউতা আহিছে , দাদাৰ লগত কথা পাতি আছে ।
: বহাচোন ভাইটি , মই তোমাৰ দেউতাক মাত এষাৰ দি আহোঁ ।
: বা , আহিলে । ইমান সময় কৰিলে যে...! উৰ্মিয়ে কলে
: কাম বন নায়ে , তৃনাৰ মাকৰ লগতে বহি কথা পাতি আছিলোঁ ।
: বা , খুড়া আৰু ভাইটিৰ বাবে চাহ অকণ কৰিবচোন ।
: ৰহ..., খুড়াক মাতষাৰ দি আহি লওঁ । বায়েকৰ পাছে পাছে মৃণালিনীয়ো মাজৰ ৰূমটোলৈ সোমাই গ'ল । ..... দীপু , তেৰ দিনত সকাম , খুড়ীক কবি । ভিনিহিয়েৰ যাব নোৱাৰিলেও বেয়া নাপাবি...!
: হ'ব বা , তই সেইবোৰ চিন্তা নকৰিবি । মই মাহঁতক কম ।
ভাইটি চাহ খোৱা...., তয়ো খাবি নেকি...!
: দিয়ে যদি দিয়ক বাইদেউ , কিয় নাখাম নো...!
: সকলোলৈকে চাহ বনাইছোঁ , তোক এনেই সুধিহে চাইছোঁ...., তই যে চাহ খাই ভাল পাওঁ সেই কথা মোক অনিয়ে কলে , সেয়ে তই ভালপোৱা গাখীৰ চাহকে বনাইছোঁ ।
: অ'...., বা , আপোনাক যে কি বুলি ধন্যবাদ দিম , ফিকা চাহসোপা খাই খাই মুখখনেই ফিকা হৈ গৈছিল.... । গাখীৰ চাহকাপ খাই দিলেহে মনটো ভাল লাগিব ।
: হ'ব , খাই গেছ হ'লে মোক নকবি আকৌ খালি পেটে আছ , দয়োজনীয়ে ঠাণ্ডা পানী অলপ খাই লগৈ যা...
চাহকন খায়ে দীপু আৰু খুড়াক যাবলৈ ওলাল , ....আমি গৈ থাকোঁ উৰ্মি , আহিছোঁ দেই সকলোকে কৈছোঁ দেই ...! অনিমেষকহে লগ নাপালোঁ ।
: খুড়া , নিমন্ত্ৰণ কৰিবলৈ পাৰিলে অনি যাব , তেৰ দিনত কাজ । দেখা পালে ভাল পাম ।। হাতজোৰ কৰি অনিৰ্বাণে ক'লে ।
: আমাক নিমন্ত্ৰণ কৰিবলৈ যাব নালাগে বোপাই , ঘৰৰ মানুহ , দেহাটো ভালে থাকিলে নিশ্চয় আহিম । আহিছোঁ দেই বোৱাৰী , উৰ্মি আহিছোঁ ।
: ঠিক আছে খুড়া , দীপু বাগান দুখন ভালকৈ চাবি । কিবা অসুবিধা হ'লে মোক ফোন কৰিবি ।
: হ'ব বা , তই সেইবোৰ মোৰ ওপৰত এৰি দি ।
দীপু আৰু খুড়াক গাড়ীত উঠি গ'লগৈ , খুড়াকহঁত ওলাই যোৱাৰ পাছতেই ঘৰখনত আকৌ মৰিশালীৰ নিস্তব্ধতাই বিৰাজ কৰিলে ।
ক্ৰমশঃ....
SMJ24ৰ ফেচবুক গ্ৰুপ - www.smj24.facebook.group
SMJ24ৰ ফেচবুক পেজ- www.smj24.facbook.page
SMJ24ৰ মুখ্য পৰিচামন সঞ্চালকৰ ফেচবুক পেজ - www.dibyadutta.com
No comments:
Post a Comment